部分移英港人「水土不服」选择回流，一对港人夫妇则因为感到香港闷，就移民去英国。然而，去到英国之后，才发现并非其他人口中赞到天上有地下无，曾遇到一个半个贱人，影响整体观感。而最难以接受是「出街食饭就贵得有D过分」。他自问英文水平未达B2要求，话谂住如果情况不似预期，就会走人咁话。
一名移英港男在社交平台threads发文，指自己与太太今年移民去英国，由于多咗好多不明朗因素，所以未出发前与太太开咗几次紧急家庭会议，重新审视系咪照去定缩沙。他提到要考虑的问题，包括：点解仲要去？如果情况不似预期，又或者适应唔到、顶唔顺，可以点算？有冇信心英文考到B2？拣边个城市？
楼主结果得出移民原因是因为闷，「喺香港咁多年开始有啲闷，趁未死出去经历吓。」他自问英文水平未达B2要求，但早知有伏都照去，话又有几年时间准备，唔得考到得啰。不过，楼主亦谂定后路，话如果情况不似预期，又或者适应唔到、顶唔顺，就会走人，「返香港系其中一个选项，但唔系唯一选项」喎。
楼主选择伦敦为落脚点，话「网上好多资讯，但系始终唔系亲身经历。唔敢高估自己慨适应能力，所以虽然可能会洗多咗，都选择取易不取难，先喺伦敦租返一年屋，之后再作打算」。
正所谓「理想很丰满，现实很骨感」，楼主到埗英国后别有一番感受，「同一个地方，有人赞到天上有地下无，亦有人踩到一文不值，暂时我觉得两样都唔系。感觉上伦敦比香港有朝气，大部分人不论种族都算友善有礼，但系间中都会遇到一个半个贱人，影响整体观感。」楼主又比较两地的消费、食物，天气等因素，指「部分消费比香港略贵但仍可接受，唯独出街食饭就贵得有D过分，不过又唔觉得特别难食喎，可能因为我哋平时食开屎啦。天气冻就真慨，不过冇想像中咁冻。」
有网民留言提醒「如果唔够钱，劝你嚟探路先，否则惊你后悔」、「唔少两公婆移民搞到关系差咗，甚至离埋婚，小心呢样」、「FYI 你嚟到第三年就系2029年英国大选，到时候如果Reform上台，BNO Visa慨命运无得预计。最坏情况系到时你喺英国准备落地生根，但系到时候成个visa scheme天翻地覆，咁你就会半天吊。做好心理准备。」
